ب مەرەما پێشڤەبرنا ئاستێ ئەکادیمی؛ دو لابۆرێن زانستی یێن سەردەمیانە ل کۆلیژا زانست ل زانکۆیا زاخۆ هاتنە ڤەکرن
ژ پێخەمەت خزمەتکرنا ڕەوتێ زانستی و ب پێشخستنا بوارێ ڤەکۆلینێن ئەکادیمی، ڕۆژا دووشەمبێ ڕێکەفتی (٢٠٢٦/٩/٢١)، ب ئامادەبوونا ڕێزدار (پ.د. دیار عبدالکریم سعید) سەرۆکێ زانکۆیا زاخۆ، و ب هەڤالینیا هاریکارێن سەرۆکێ زانکۆیێ و ڕاگرا کۆلیژا زانست، مەراسیمێن ڤەکرنا دو لابۆرێن (تاقیگەهێن) سەردەمیانە و پێشکەفتی بۆ قوتابییێن خواندنا بلند و ڤەکۆلەرێن زانکۆیێ ل کۆلیژا ناڤبری هاتنە ئەنجامدان.
د درێژیا ڤێ سەرەدانێ دا، بەڕێز سەرۆکێ زانکۆیێ ژ نێزیک ڤە سەرەدانا یەکەیێن جودا یێن ئەڤان لابۆران کر و هایداری پێداویستی و ئامیرەیێن وان یێن زانستی بوو. د پەراوێزێ ڤێ سەرەدانێ دا، بەڕێزی تەکەزی ل سەر ڕۆل و گرنگیا هەبوونا ژێرخانەکا زانستی یا ب هێز کر بۆ بلندکرنا ئاستێ زانکۆیێ، و خواست کو ئەڤ پرۆژەیە ببیتە پێگەهەکێ ئەکادیمی یێ مفابەخش بۆ سەرجەم قوتابی و ڤەکۆلەرێن دەڤەرێ ب گشتی، داکو ب ڕێیا ڤەکۆلینێن خۆ یێن زانستی خزمەتەکا بەرچاڤ پێشکەشی زانکۆیێ و جڤاکی بکەن.